Layang kanggo Gusdhur

Seka pojok-pojok watese netra

Kepareng Sang Hywang Bayu iki nyuwara

Kabeh perkara kuciwa

Marang siji supata saka Bapak kang nguwasa

Supata kanggo ngrungokake suwarane para kunjana-papa

Supata kanggo ngangetke papan kang tan kendhat nggresula

Kita kang wis milih njenengan

Kanggo mbangun limangtaune Sang Hywang Wektu

Supaya bisa menehi kang ora bisa mangan

Nganti pasuryan kang sarwa mbiru

Deloken iki Pak,

Irama lan pathet tangisane para kunjana-papa

Kaya kalaka kang nut lakuning samudra

Nalika dolar sansaya ngunggah-unggahi

Nalika BBM munggah mudhun tan ana kang bisa mungkasi

Mblusuko maneh Bapak

Nalika rega-rega pasar trus mabur

Merga ora ana kang wani mapak

Wujudke supatamu

Kanggo gawe guyune para kunjana-papa

Aja dadi pawongan kang tan mitayani

Kanthi kahanan kang sansaya ora penak iki

Dhunke rega-rega

Supaya ibu-ibu bisa legawa