Geguritan TIRTA GENI

Pak tani celathu mring tangga gawe guyu

Teka lunga nimbang ngelmu

Bingung endi kang kudu ditiru

Dene pak lurah ngendika

Tirta geni wis dhuwur ngidak boma

Sajake bakal mundhak mudhun gawe sengsara

Pak camat ngguya ngguyu nuntun anak

Anake nganggo jaket abang

Abange semu putih pucet

Nunggu bapak mulih nggawa sega liwet

Lambungku mlintir

Ususku kenthir

Pak lurah malah mlaku mlipir

Mlipire nemoni pak camat

Pak camat malah tutup mripat

Maju mundur nembung tirta

Tirtane wus arupa dluwang

Dluwange dluwang abang

Dicandhet kanthi rinaket

Nora diumbar marang sapadha

Tirta iku lumaku nunggoni wektu

Tirta iku mlaku lunga dienteni sindu

E malah diajak mlayu dening dliyu

Dliyune seragam coklat

Coklate linambar sandhal landa ireng

Tirta geni,

Sewu dadi rong ewu

Limang ewu dadi nora diliru

Nora diliru ?

Apa pancen ditinggal mlayu ?

Tirta geni dadi tandha jroning jaja

Padudon rasa ngajab prasaja

Prasaja kang gawe prahara

Pak tani amung anteng meneng

Ngetung gabah kang dikupeng

Dikupeng janma kang gawe ngliyeng

Gabah sekilo warih rong kilo

Siji bandhing loro

Nekak janma kang nora bodho

Pak camat, digugu lan drumat

Pak lurah, dadi korban kang nora kerumat

Dene pak tani, amung nggeget untu nututi wektu